DOST mərkəzləri xidmət göstərdiyi regionun əhalisinin sayı əsas götürülərək, 5 kateqoriya üzrə fəaliyyət göstərir.

A kateqoriyası - əhalisi 200 000 nəfərdən artıq
B kateqoriyası - əhalisi 150 000 - 199 999 nəfər
C kateqoriyası - əhalisi 100 000 - 149 999 nəfər
D kateqoriyası - əhalisi 50 000 - 99 999 nəfər
E kateqoriyası - 49 999 nəfərədək

Yasamal, Səbail və Qaradağ rayon sakinlərinə xidmət edən 1 saylı Bakı DOST Mərkəzi Yasamal rayonu, İ. Qutqaşınlı küçəsi, 86 ünvanında yerləşir. Xəzər və Pirallahı rayon sakinlərinə xidmət edən 2 saylı Bakı DOST Mərkəzi Xəzər rayonu, Şüvəlan qəsəbəsi, A.İldırım küçəsi, 30 b ünvanında yerləşir. Nizami, Sabunçu və Suraxanı rayon sakinlərinə xidmət edən 3 saylı Bakı DOST Mərkəzi isə Nizami rayonu, Heydər Əliyev prospekti, 183 b ünvanında yerləşir.

DOST mərkəzlərində göstərilən xidmətlərin siyahısı

1. Əmək və Əhalinin Sosial Müdafiəsi Nazirliyinin fəaliyyət istiqamətlərinə dair arayışlar verilməsi

2. Əmək münasibətləri sahəsində işəgötürənlərə və işçilərə göstərilən xidmətlər

3. Əlillik və sağlamlıq imkanlarının məhdudluğu sahəsində göstərilən xidmətlər

4. Məşğulluq sahəsində göstərilən xidmətlər

5. Əmək pensiyası və sosial müavinət sahələrində göstərilən xidmətlər

6. Ünvanlı dövlət sosial yardımın təyin edilməsi

7. Azərbaycan Respublikası Prezidentinin təqaüdünün təyin edilməsi

8. Sığortaolunanların fərdi uçota alınması və uçotdan çıxarılması

9. Sosial xidmət sahəsində göstərilən xidmətlər

10. Funksional yardımçı xidmətlər

Daha ətraflı: http://e-qanun.az/framework/40918

1 saylı Bakı DOST Mərkəzi

Bazar ertəsi - cümə axşamı: 09:00-18:00

Cümə günü: 09:00-17:00

Şənbə-bazar: qeyri-iş günü

2 saylı Bakı DOST Mərkəzi

Bazar ertəsi-cümə axşamı: 09:00-18:00

Cümə günü - 09:00-17:00

Şənbə-bazar: qeyri-iş günü

3 saylı Bakı DOST Mərkəzi

Bazar ertəsi-cümə axşamı: 09:00-18:00

Cümə günü: 09:00-17:00

Şənbə-bazar: qeyri-iş günü

1 saylı Bakı DOST Mərkəzi 9 may 2019-cu il tarixində açılıb.

2 saylı Bakı DOST Mərkəzi 24 dekabr 2019-cu il tarixində açılıb.

3 saylı Bakı DOST Mərkəzi 19 may 2020-ci il tarixində açılıb.

1) 4 saylı Bakı DOST mərkəzi

Ümumi məlumat
Xidmət göstəriləcək rayonlar – Binəqədi və Nərimanov
Açılış tarixi – Noyabr 2020-ci il
Göstərilən xidmətlərə dair məlumat
Xidmət sayı – 132
Vətəndaş qəbul etmə imkanı – Günlük 350-400 nəfər
Əhatə edilən əhali sayı – 444 100 nəfər
Sosial müdafiəyə cəlb olunmuş əhali sayı – 85 548 nəfər
İnzibati bina haqqında məlumat
Ünvan – Bakı şəhəri, Binəqədi rayonu, Z. Bünyadov prospekti 3103.
Mərtəbə sayı – 2
DOST mərkəzinin ümumi sahəsi – 4892 m2

2) DOST Abşeron mərkəzi

Ümumi məlumat
Xidmət göstəriləcək rayonlar – Abşeron
Açılış tarixi – Dekabr 2020-ci il
Göstərilən xidmətlərə dair məlumat
Xidmət sayı – 132
Vətəndaş qəbul etmə imkanı – Günlük 350-400 nəfər
Əhatə edilən əhali sayı – 212 600 nəfər
Sosial müdafiəyə cəlb olunmuş əhali sayı – 36 021 nəfər
İnzibati bina haqqında məlumat
Ünvan – Abşeron rayonu, Xırdalan şəhəri, Bakı-Sumqayıt şosesi 7-ci km, “Abşeron Gənclər Şəhərciyi” yaşayış kompleksi, bina 27
Mərtəbə sayı – 3
DOST mərkəzinin ümumi sahəsi – 5704 m2

3) DOST Bərdə mərkəzi

Ümumi məlumat
Xidmət göstəriləcək rayonlar – Bərdə
Açılış tarixi – Mart/Aprel 2021-ci il
Göstərilən xidmətlərə dair məlumat
Xidmət sayı – 132
Vətəndaş qəbul etmə imkanı – Günlük 350-400 nəfər
Əhatə edilən əhali sayı – 260 500 nəfər
Sosial müdafiəyə cəlb olunmuş əhali sayı – 54 232 nəfər
İnzibati bina haqqında məlumat
Ünvan – Bərdə şəhəri, Üzeyir Hacıbəyov küçəsi.
DOST mərkəzinin ümumi sahəsi – 829 m2
Mərtəbə sayı (zirzəmi daxil) – 4
Peşə məktəbinin ümumi sahəsi – 1693 m2
Mərtəbə sayı (zirzəmi daxil) – 4

4) DOST Şəki mərkəzi

Ümumi məlumat
Xidmət göstəriləcək rayonlar – Şəki
Açılış tarixi – Fevral/Mart 2021-ci il
Göstərilən xidmətlərə dair məlumat
Xidmət sayı – 132
Vətəndaş qəbul etmə imkanı – Günlük 350-400 nəfər
Əhatə edilən əhali sayı – 230 900 nəfər
Sosial müdafiəyə cəlb olunmuş əhali sayı – 49 709 nəfər
İnzibati bina haqqında məlumat
Ünvan – Şəki şəhəri, Zərifə Əliyeva küçəsi.
DOST mərkəzinin ümumi sahəsi – 798.57 m2
Mərtəbə sayı – 3
Peşə məktəbinin ümumi sahəsi – 1309.77 m2
Mərtəbə sayı – 4
Emalatxana binası – 1112.24 m2
Mərtəbə sayı – 1

5) DOST Quba mərkəzi

Ümumi məlumat
Xidmət göstəriləcək rayonlar – Quba
Açılış tarixi – Mart/Aprel 2021-ci il
Göstərilən xidmətlərə dair məlumat
Xidmət sayı – 132
Vətəndaş qəbul etmə imkanı – Günlük 350-400 nəfər
Əhatə edilən əhali sayı – 269 800 nəfər
Sosial müdafiəyə cəlb olunmuş əhali sayı – 54 510 nəfər
İnzibati bina haqqında məlumat
Ünvan – Quba rayonu, Fətəli Xan küçəsi.
DOST mərkəzinin ümumi sahəsi – 3357.08 m2
Mərtəbə sayı (zirzəmi daxil) – 3
Peşə məktəbinin ümumi sahəsi – 4941.55 m2
Mərtəbə sayı (zirzəmi daxil) – 5

6) DOST Sabirabad mərkəzi

Ümumi məlumat
Xidmət göstəriləcək rayonlar – Sabirabad
Açılış tarixi – Mart 2021-ci il
Göstərilən xidmətlərə dair məlumat
Xidmət sayı – 132
Vətəndaş qəbul etmə imkanı – Günlük 350-400 nəfər
Əhatə edilən əhali sayı – 423 100 nəfər
Sosial müdafiəyə cəlb olunmuş əhali sayı – 84 075 nəfər
İnzibati bina haqqında məlumat
Ünvan – Sabırabad rayonu, Heydər Əliyev prospekti
Mərtəbə sayı – 2
DOST mərkəzinin ümumi sahəsi – 2941m2

7) DOST Sumqayıt mərkəzi

Ümumi məlumat
Xidmət göstəriləcək rayonlar – Sumqayıt
Açılış tarixi – Aprel 2021-ci il
Göstərilən xidmətlərə dair məlumat
Xidmət sayı – 132
Vətəndaş qəbul etmə imkanı – Günlük 350-400 nəfər
Əhatə edilən əhali sayı – 360 000 nəfər
Sosial müdafiəyə cəlb olunmuş əhali sayı – 79 288 nəfər
İnzibati bina haqqında məlumat
Ünvan – Sumqayıt şəhəri, Z. Hajiyev küçəsi.
Mərtəbə sayı (zirzəmi daxil) – 5
DOST mərkəzinin ümumi sahəsi – 3500 m2

Dayanıqlı və Operativ Sosial Təminat Agentliyində, xüsusən DOST mərkəzlərində vakant vəzifələrə işə qəbul bir qayda olaraq Azərbaycan Respublikasının Əmək və Əhalinin Sosial Müdafiəsi Nazirliyinin əməkdaşları arasında daxili müsabiqə əsasında həyata keçirilir. Gələcəkdə ehtiyac yarandıqda işə qəbulla bağlı ümumi müsabiqənin elan edilməsi nəzərdə tutulur. Elan saytımızda, sosial şəbəkə hesablarımızda və kütləvi informasiya vasitələrində yerləşdiriləcək və özündə vakant vəzifələr, eləcə də müsabiqənin şərtləri barədə ətraflı məlumatı əks etdirəcəkdir. Qeyd edilənləri nəzərə alaraq, ümumi müsabiqə elan olunduqdan sonra vətəndaşlar müsabiqədə iştirak üçün müraciət edə bilərlər.

Agentliyin fəaliyyətinin məqsədi “DOST” mərkəzlərində xidmətlər göstərilməsini təşkil etməkdən, “DOST” mərkəzlərini idarə etməkdən, onların fəaliyyətinə nəzarəti və fəaliyyətinin qiymətləndirilməsini həyata keçirməkdən, müvafiq sahədə hüquqi və fiziki şəxslərə təqdim olunan xidmətlərin inkişafı, təkmilləşdirilməsi və həmin xidmətlərin göstərilməsində şəffaflığın artırılması ilə bağlı tədbirlər görməkdən ibarətdir.

Agentliyin fəaliyyət istiqamətləri aşağıdakılardır:

- “DOST” mərkəzlərini idarə etmək, onların fəaliyyətinə nəzarəti və fəaliyyətinin qiymətləndirilməsini həyata keçirmək;

- “DOST” mərkəzlərində xidmətlərin “bir pəncərə”, həmçinin operativlik, vətəndaş məmnunluğu, şəffaflıq, nəzakətlilik, məsuliyyət və rahatlıq prinsipləri əsasında həyata keçirilməsi üçün tədbirlər görmək;

- “DOST” mərkəzlərinin inkişafını, həmin mərkəzlərdə göstərilən xidmətlərin keyfiyyətinin yüksəldilməsini, onların elektron qaydada həyata keçirilməsini və təkmilləşdirilməsini, habelə innovasiyaların tətbiqini təmin etmək;

- Övladlığagötürmə sahəsində bu Nizamnamə ilə müəyyən edilən vəzifələrin icrasını təmin etmək;

- Müvafiq sahədə fəaliyyətin təkmilləşdirilməsi və şəffaflığın artırılması məqsədilə tədbirlər görmək.

Vətəndaşlar Əmək və Əhalinin Sosial Müdafiəsi Nazirliyinin səlahiyyətlərinə dair məsələlər, o cümlədən sosial təminat, əlilliyin müəyyən edilməsi və tibbi-sosial reabilitasiya, məşğulluğun təminatı, iş yerlərində əmək qanunvericiliyinə əməl olunması və bu sahələr üzrə elektron xidmətlərdən istifadə ilə əlaqədar məlumat, sorğu və şikayət xarakterli müraciətlər üçün “Çağrı Mərkəzi 142” ilə əlaqə saxlaya bilərlər.

"Könüllü DOST" Dost mərkəzlərində könüllü fəaliyyətini həyata keçirən proqramdır. Könüllülər DOST mərkəzlərində vətəndaşların qarşılanması və xidmət pəncərələrinə yönləndirilməsi, vətəndaş axınının, növbələrin idarə edilməsində iştirak, vətəndaşların məlumatlandırılması, elektron sistemlərdən istifadə üzrə köməklik, xidmət üzrə sənədlərin siyahısı ilə vətəndaşların tanış edilməsi,müxtəlif anket, forma və s. doldurulmasında köməklik, əlillərə xüsusi diqqət və qayğı göstərilməsi, rəy sorğularının keçirilməsi və bir çox başqa sahələrdə fəaliyyət gösətərirlər. Gənclər könüllülük fəaliyyəti ilə həm iş təcrübələrini artırır, həm də əhalinin xüsusi həssas təbəqəsi ilə işləmək bacarığı əldə edirlər.

DOST Agentliyi təcrübə qazanmaq istəyən gəncləri “Könüllü DOST” proqramına dəvət edir! Proqrama 15-29 yaşlı gənclər qoşula bilərlər. Könüllülük fəaliyyətinin müddəti 2 aydır və iş 3 növbədə təşkil olunur. Könüllü fəaliyyətini uğurla başa vuran gənclərin hər birinə xüsusi sertifikat verilir. “Könüllü DOST” layihəsinə qoşulmaq istəyən gənclər bu müraciət formasını doldura bilərlər: https://bit.ly/2KlHxNe

Tələblərə uyğun gələn namizədlərlə əlaqə saxlanılacaq və onlar müsahibəyə dəvət olunacaqlar.

"Könüllü DOST" proqramı və "Üçüncü Bahar" layihəsinin birgə təşkilatçılığı ilə "Gümüşü DOST" altproqramı pensiya yaşına çatmış şəxslərin aktiv həyat tərzinin təmin olunması və asudə vaxtlarının səmərəli təşkilinə dəstək məqsədi daşıyır. Proqram yaşlı vətəndaşların mərkəzlərdə könüllü kimi fəaliyyətə cəlb edilmələrini nəzərdə tutur.

"Gümüşü DOST"a qoşulmaq istəyənlər bu linkə daxil olaraq qeydiyyatdan keçə bilərlər: http://bit.ly/2LGsf80

Evdə və yaxud istənilən başqa məkanda olaraq da DOST Agentliyinin könüllüsü kimi fəaliyyət göstərmək mümkündür. Bunun üçün yalnız kompüter, planşet və ya smartfon kifayət edir! “Virtual DOST” altproqramına qoşulanlar təhsil, təlim, tədqiqat, PR, konsaltinq və s. sahələr üzrə verilən tapşırıqları onlayn qaydada yerinə yetirirlər. Bu altproqram əlilliyi olan şəxslərin sosial inteqrasiyası baxımından da uyğunluq təşkil edir və onların evdən çıxmadan könüllü kimi fəaliyyət göstərmələri üçün yaxşı imkan yaradır.

Könüllülərin seçimi məqsədi ilə hər ay müsahibələr keçirilir. Bütün kriteriyalar üzrə könüllü olmaq üçün uyğun görülən şəxslər müsahibəyə dəvət olunur. Dəvət edilməyən şəxslər isə növbəti seçimlər zamanı müsahibəyə çağırılmaq şanslarını saxlayırlar. Belə ki, onlar bir dəfə qeydiyyatdan keçməklə bütün seçimlərdə iştirak edə bilərlər.

Könüllülər uyğun vakansiya olduğu təqdirdə tələb olunan meyarlara cavab verdikdə işlə təmin olunur. Hazırda DOST mərkəzində könüllü olmuş və DOST Agentliyi, DOST mərkəzləri və Çağrı Mərkəzində çalışan bir neçə belə şəxs var.

Sanatoriyalara göndəriş almaq üçün vətəndaşın əlilliyi olmalı və işləməməlidir. Yasamal və Səbail rayon sakinləri İ. Qutqaşınlı küçəsi, 86 ünvanında yerləşən 1 saylı Bakı DOST Mərkəzinə, Xəzər və Pirallahı rayon sakinləri isə Şüvəlan qəsəbəsi, A. İldırım küçəsi, 30 b ünvanında yerləşən  2 saylı Bakı DOST Mərkəzinə müraciət edə bilərlər. Digər rayon sakinləri isə DSMF-in müvafiq rayon (şəhər) şöbəsinə müraciət etməlidir.

Əlilliyin təyini ilə bağlı DOST mərkəzlərində yalnız informasiya almaq mümkündür. Əlilliyin müəyyən edilməsi üçün vətəndaş yaşayış yeri üzrə poliklinikaya müraciət etmәlidir. Zəruri olan sənədlərin toplanması üçün poliklinika tərəfindən səhiyyə müəssisələrinə göndərişlər verilə bilər. Məlumatlar toplandıqdan sonra müraciət poliklinika tərəfindən elektron qaydada Tibbi Sosial Ekspertiza və Reabilitasiya alt sisteminə göndərilir.

DOST Agentliyinin, onun nəzdindəki DOST mərkəzlərinin əsas məqsədi sosial müdafiəyə ehtiyacı olan şəxslərin, o cümlədən əlillərin sosial müdafiəsi ilə məşğul olmaqdır. Həmçinin əlilliyi olan şəxslərə pensiyaların, sosial müavinətlərin, təqaüdlərin təyin edilməsi, onların peşə-reabilitasiya mərkəzlərinə yerləşdirilməsi, sosial məişət xidmətinə götürülməsi məsələləri də var.

Ünvanlı dövlət sosial yardıma e-gov.az portalına daxil olaraq "Ünvanlı sosial yardım" bölməsi üzərindən müraciət edə bilərsiniz.

Bunun üçün aşağıda qeyd edilmiş linkə daxil olaraq müraciət etmək mümkündür. Müraciət üçün notariat orqanından təmsilçilik ərizəsi alınır:

https://www.e-gov.az/az/services/read/3421/1?fbclid=IwAR2jxIFqSD-2G7RAFrwK_14N2RIMJnmZnmHLQsMp3zhoAzdovsZClsRZ6q8

Aşağıdakı linkdə isə həmin prosedurun izahı verilib:

https://bit.ly/2Wxja6t

Uşağın doğulmasına görə birdəfəlik müavinətin təyinatı (ilkin mərhələdə) hər iki valideyn işləmədiyi halda elektron qaydada həyata keçirilir. Doğulan uşaq üçün doğum haqqında şəhadətnamə alındığı gündən sonra Əmək və Əhalinin Sosial Müdafiəsi Nazirliyi tərəfindən Ədliyyə Nazirliyinin müvafiq informasiya sisteminə inteqrasiya şəraitində, həmin sistemdən əldə olunan məlumat əsasında müavinət e-qaydada təyin olunur. Bunun üçün valideynlərin hər hansı quruma müraciət və sənəd təqdim etmələrinə artıq ehtiyac yoxdur.

Valideynlərin işləmədiyi barədə məlumat real vaxt rejimində elektron informasiya ehtiyatlarından əldə olunur. Birdəfəlik müavinət uşağın anasına (ana olmadıqda və ya digər istisna hallarda atasına) təyin edilir və bu barədə, həmçinin müavinəti hansı bankdan alacağı barədə valideynə sms-məlumat göndərilir. Bundan sonra valideyn şəxsiyyət vəsiqəsini təqdim etməklə müvafiq bankdan müavinəti ala bilir.

I dərəcə əllilliyi olan şəxslərə qulluq edən şəxs Dövlət Sosial Müdafiə Fondunun yaşayış yeri üzrə müvafiq şəhər, rayon şöbəsinə, Səbail, Yasamal, Xəzər və Pirallahı rayon sakinləri isə həm də DOST mərkəzlərinə müraciət edə bilər.

I dərəcə əlilliyi olan şəxsin ailə üzvləri müraciət edirsə, o zaman onların qohumluq əlaqəsini təsdiq edən sənəd və təqaüd almaq barədə müraciət edən şəxsin həqiqətən ona qulluq etdiyi barədə əlilliyi olan şəxsin ərizəsi təqdim edilir. (Ərizə I dərəcə əlilliyi olan şəxsin özü tərəfindən təqdim edilmədiyi halda notarial qaydada təsdiq edilərək təqdim olunmalıdır.)

I dərəcə əlilliyi olan şəxsə qulluq edən, ailə üzvü olmayan şəxs müraciət etdikdə isə patronajın təyin edilməsi barədə qəyyumluq və himayəçilik orqanının (yerli icra hakimiyyətinin qəyyumluq, himayəçilik komissiyası) qərarı və təqaüd almaq barədə müraciət edən şəxsin həqiqətən ona qulluq etdiyi barədə əlilliyi olan şəxsin ərizəsi təqdim olunmalıdır.

Azərbaycan Respublikasının ərazi bütövlüyünün və Konstitusiya quruluşunun müdafiəsi zamanı fiziki sağlamlıqlarını itirmiş vətəndaşlar və şəhid ailələri dövlət hesabına mənzillə (fərdi evlə) təmin olunmaq üçün yaşadıqları rayon (şəhər) İcra Hakimiyyətlərində mənzil növbəsinə götürülürlər. Bu kateqoriyadan olan şəxslərin mənzil növbəsinə götürülməsi, növbənin dəyişdirilməsi və ləğv olunması müvafiq rayon (şəhər) İcra Hakimiyyətlərinin səlahiyyətindədir.

Daha ətraflı: http://sosial.gov.az/menzilleteminat

15 yaşı tamam olmuş hər bir şəxs işaxtaran kimi "e-gov.az" və ya "e-sosial.az" (https://www.e-gov.az/az/login/?return=/az/services/readwidenew/3743) portalları vasitəsilə "Məşğulluq" altsistemində yerləşdirilən "Müraciət-Ərizə"ni dolduraraq təsdiq edir. Müraciət "Məşğulluq" altsistemi tərəfindən qəbul edildikdən sonra həmin şəxs işaxtaran kimi qeydiyyata alınır, bu barədə məlumat işaxtaranın elektron kabinetində yerləşdirilir və şəxsin mobil telefonuna göndərilir. İşaxtaran kimi qeydiyyata alınmış, işi və qazancı olmayan əmək qabiliyyətli şəxsə 5 iş günü müddətində münasib iş təklif etmək mümkün olmadıqda və ya işəgötürən göndəriş verilmiş vakansiyanı qəbul etməkdən imtina etdikdə, eləcə də hərəkətsizliyi halında həmin şəxsin işsiz kimi qeydiyyata alınması barədə qərar qəbul olunur və tərtib olunmuş fərdi məşğulluq vərəqində müvafiq qeydlər aparılmaqla onun şəxsi kabinetinə yerləşdirilir.

Bundan başqa Səbail və Yasamal rayon sakinləri 1 saylı Bakı DOST Mərkəzinə, Xəzər və Pirallahı rayon sakinləri 2 saylı Bakı DOST Mərkəzinə, Sabunçu, Nizami və  Suraxanı rayon sakinləri isə 3 saylı Bakı DOST Mərkəzinə müraciət edərək işaxtaran və işsiz kimi qeydiyyatdan keçə bilərlər.

Əmək və Əhalinin Sosial Müdafiəsi Nazirliyi tərəfindən “Əlilliyi olan şəxslərin və sağlamlıq imkanları məhdud uşaqların sosial müdafiəsi və reabilitasiyası Proqramı”na uyğun olaraq sosial-məişət problemlərinin həlli ilə bağlı maddi yardımların göstərilməsi də nəzərdə tutulmuşdur. Bununla bağlı Yasamal və Səbail rayon sakinləri 1 saylı Bakı DOST Mərkəzinə, Xəzər və Pirallahı rayon sakinləri 2 saylı Bakı DOST Mərkəzinə, digər rayon sakinləri isə DSMF-in yerli rayon (şəhər) şöbələrinə müraciət edə bilərlər.

Lazım olan sənədlər:

- əlillik vəsiqəsi

- şəxsiyyət vəsiqəsi

- bank hesab nömrəsi

1. Övladlığagötürmə ilə bağlı müraciətlərin qəbul edilməsi;

2. Övladlığagötürmə sahəsində məsləhət və məlumat verilməsi.