Karyera

Dayanıqlı və Operativ Sosial Təminat Agentliyində, xüsusən “DOST” mərkəzlərində vakant vəzifələrə işə qəbulun bir qayda olaraq ümumi (vakant vəzifələrin tutulması şərtlərinə cavab verən bütün vətəndaşların iştirakını nəzərdə tutan) və daxili (vakant vəzifələrin tutulması şərtlərinə cavab verən Azərbaycan Respublikası Əmək və Əhalinin Sosial Müdafiəsi Nazirliyinin və onun tabe qurumlarının əməkdaşlarının iştirakını nəzərdə tutan) müsabiqələr əsasında həyata keçirilməsi nəzərdə tutulur.
Daxili müsabiqə elanları Azərbaycan Respublikası Əmək və Əhalinin Sosial Müdafiəsi Nazirliyinin mərkəzləşdirilmiş elektron informasiya sistemində (MEIS) yerləşdirilərək əməkdaşların diqqətinə çatdırılır.
Ümumi müsabiqə elanları isə kütləvi informasiya vasitələrində yerləşdiriləcək və özündə vakant vəzifələr, eləcə də müsabiqənin şərtləri barədə ətraflı məlumatı əks etdirəcəkdir.
Qeyd edilənləri nəzərə alaraq, ümumi müsabiqə elan olunduqda vətəndaşlar müsabiqədə iştirak üçün müraciət edə bilərlər.

"Könüllü DOST" proqramı

DOST mərkəzlərinin işinin təşkili zamanı vətəndaşların qarşılanması və xidmət pəncərələrinə yönləndirilməsi, vətəndaş axınının, növbələrin idarə edilməsində iştirak, vətəndaşların məlumatlandırılması, elektron sistemlərdən istifadə üzrə köməklik, xidmət üzrə sənədlərin siyahısı ilə vətəndaşların tanış edilməsi, müxtəlif anket, forma və s. doldurulmasında köməklik, əlilliyi olan şəxslərə xüsusi diqqət və qayğı göstərilməsi, rəy sorğularının keçirilməsi və bir çox başqa işlərdə könüllülərin danılmaz xidməti var. Bu fəaliyyət sayəsində gənclər həm iş təcrübələrini artırır, həm də əhalinin xüsusi həssas təbəqəsi ilə işləmək bacarığı əldə edirlər.

DOST Agentliyində könüllülük fəaliyyəti 5 istiqamətdə təşkil edilib: "Gənc DOST", "Gümüşü DOST", "İnklüziv DOST", "Distant DOST" və "Korporativ DOST" altproqramları.

"Gənc DOST" altproqramında 16-29 yaşlı gənclər iştirak edə bilərlər. Könüllülük fəaliyyətinin müddəti 2 aydır və iş prosesi gündəlik olaraq 3 növbədə təşkil olunur. "Gənc DOST" altproqramı könüllülər üçün sosial əhəmiyyətli fəaliyyətdə rola malik olma, işgüzar vərdişlər əldə etmə, fərdi inkişaf, asudə vaxtın səmərəli keçirilməsi, yeni dostlar, əlaqələr və karyera yolunda ilk uğurlu addımların təməli baxımından faydalıdır. "Gümüşü DOST" altproqramı yaşı 50-dən yuxarı olan şəxslərin aktiv həyat tərzinin təmin olunması və asudə vaxtlarının səmərəli təşkilinə dəstək məqsədi daşıyır. “İnklüziv DOST” altproqramı DOST İnklüziv İnkişaf və Yaradıcılıq Mərkəzinə müraciət edən benefsiarlara xidmət göstərərək təcrübə qazanması, fərdi inkişafı və karyerada ilk uğurlu addımlarının atılması məqsədi daşıyır.

Artıq evdə və yaxud istənilən başqa məkanda olaraq da DOST Agentliyinin könüllüsü kimi fəaliyyət göstərmək mümkündür. Bunun üçün yalnız kompüter, planşet və ya smartfon kifayət edir! “Distant DOST” müəyyən sahələrdə hazırlanan mikrolayihələr üzrə verilən tapşırıqların onlayn qaydada könüllülər tərəfindən yerinə yetirilməsi məqsədi daşıyan altproqramdır. Bu proqram əlilliyi olan şəxslərin sosial inteqrasiyası baxımından da uyğunluq təşkil edir və onların evdən çıxmadan könüllü kimi fəaliyyət göstərmələri üçün yaxşı imkan yaradır.

Yuxarıdakı altproqramlar üzrə fəaliyyət göstərmək istəyənlər bu linkə daxil olaraq qeydiyyatdan keçə bilərlər.

“Korporativ DOST” altproqramında isə əsas məqsəd qrupuna ictimai-sosial məsuliyyətlilik çərçivəsində əməkdaşlıq etməkdə maraqlı olan özəl, ictimai, dövlət və digər təşkilatlar daxildir. Təşkilatlar bu linkə daxil olaraq qeydiyyatdan keçə bilərlər.

Bütün bu altproqramları özündə cəmləşdirən "Könüllü DOST" proqramının məqsədi ictimai iştirakçılığın təşkili, könüllü hərəkatına dəstək, gənclər siyasətinə dəstək, dövlət-vətəndaş münasibətlərinin inkişafı, yüksək keyfiyyətli xidmət, gənclərin əmək bazarına hazırlığı və fəal yaşlanmanın təmin olunmasıdır. Proqram özündə dövlətçilik və vətənpərvərlik, ictimai-sosial məsuliyyətlilik, birlik və əməkdaşlıq, qayğıkeşlik və yardımsevərlik prinsiplərini ehtiva edir. Könüllü fəaliyyətini uğurla başa vuran gənclərin hər birinə xüsusi sertifikat verilir.

Vakansiyalar

Təşkilat: Dayanıqlı və Operativ Sosial Təminat Agentliyi
Struktur bölmənin adı: Hüquq departamenti / Normativ hüquqi təminat şöbəsi
Vakansiya: Mütəxəssis

İşin təsviri:

• Yeni hüquqi aktların tətbiqinin təşkili, icra vəziyyətinin öyrənilməsi və nəticələrinin təhlil edilməsi;
• Hüquqi aktların təkmilləşdirilməsi ilə bağlı təkliflərin verilməsi və hüquqi akt layihələrinin hazırlanması;
• Daxil olan hüquqi akt layihələrinin ekspertizasının həyata keçirilməsi, rəyin verilməsi;
• Müvafiq sahələrdə xidmətlərin göstərilməsi üzrə qayda, prosedur və standartların hazırlanması;
• Hüquqi aktların tətbiqi (o cümlədən kolliziya halları) ilə bağlı metodiki köməkliyin göstərilməsi üzrə zəruri tədbirlərin görülməsi.
• Fəaliyyət istiqamətinə uyğun olaraq hesab, arayış və təhlillərin hazırlanması habelə digər zəruri funksiyaların yerinə yetirilməsi.

Vəzifənin tutulmasına dair tələblər:

• Təhsil tələbi: hüquqşünaslıq, beynəlxalq hüquq ixtisası üzrə ali təhsil;
• İş təcrübəsi: hüquqşünaslıq sahəsi (habelə bilavasitə normayaratma sahəsi) üzrə azı 1 il iş təcrübəsi;
• Dil bilikləri: Azərbaycan dilini yazılı və şifahi şəkildə mükəmməl səviyyədə bilmək (rus və ingilis dillərini bilmək arzuolunandır);
• Kompüter bilikləri: Microsoft Office proqramlarından yüksək səviyyədə istifadə bacarığı;
• Bilməlidir: “Normativ hüquqi aktlar haqqında” Azərbaycan Respublikasının Konstitusiya Qanunu, Azərbaycan Respublikasının Əmək Məcəlləsi, Mülki Məcəlləsi, İnzibati Xətalar Məcəlləsi, Mülki Prosessual Məcəlləsi, “İnzibati icraat haqqında” Azərbaycan Respublikası Qanunu və DOST Agentliyinin fəaliyyət istiqamətləri üzrə hüquqi aktlar;
• Vəzifəyə dair tələb edilən şəxsi keyfiyyətlər və bacarıqlar: Analitik təhlil və məntiqi düşünmə, ünsiyyət qurma, emosional stabillik, operativlik və çeviklik, dəqiqlik və diqqətlilik, komandada işləmə

Əlavə məlumatlar

• İş yerinin ünvanı: Bakı şəhəri, Yasamal rayonu, İ.Qutqaşınlı küçəsi, 86;
• İş qrafiki: Bazar ertəsi - Cümə (09:30-18:30).

Müraciət qaydası:

• Namizədlər dost_hr@sosial.gov.az e-mail adresinin mövzu hissəsinə “Hüquqşünas” qeyd etməklə CV-ni göndərə bilərlər.
• İşə qəbul mərhələsinə yalnız tələblərə cavab verən namizədlər cəlb ediləcəkdir.