Arayışların verilməsi

Əmək və Əhalinin Sosial Müdafiəsi Nazirliyinin fəaliyyət istiqamətləri üzrə arayışların əldə edilməsi

Arayışlar hansı xidmət istiqamətlərini əhatə edir?

• Məşğulluq
• Əmək münasibətləri
• Əmək pensiyası
• Sosial müavinətlər
• Azərbaycan Respublikası Prezidentinin təqaüdləri
• Ünvanlı dövlət sosial yardımı
• Dövlət sosial sığorta sistemində fərdi uçot
• Sosial xidmət
• Əlillik

Elektron arayış nədir?

Elektron arayış şəxsin məşğulluq, əmək pensiyası, sosial müavinətlər, təqaüdlər, ünvanlı dövlət sosial yardımı, dövlət sosial sığorta sistemində fərdi uçot, sosial xidmət və əlillik xidmət istiqamətləri üzrə şəxsin fərdi məlumatlarının əks olunduğu və onları təsdiqləyən elektron portaldan əldə olunan sənəddir.   

Elektron arayışları haradan əldə etmək olar?

Elektron arayışları Azərbaycan Respublikasının Əmək və Əhalinin Sosial Müdafiəsi Nazirliyinin e-social.gov.az internet portalında şəxsi kabinetə daxil olaraq və ya “DOST” mərkəzlərinə müraciət edərək əldə etmək mümkündür.

e-social.gov.az portalında necə qeydiyyatdan keçmək olar?

Qeyd olunan elektron portal "Digital login" vahid giriş sisteminə qoşulmuşdur. Şəxsi hesaba “İdentifikasiya nömrəsi ilə”, “SİMA Rəqəmsal İmza”, “ASAN İmza”, “Elektron İmza”, “BSXM – Elektron İmza”  ilə giriş edilə bilər. Qeydiyyat üçün  "İdentifikasiya nömrəsi ilə" bölməsinə daxil olaraq, "Qeydiyyat" düyməsini sıxıb, videoqeydiyyata başlanıla bilər. Müraciətin dərhal cavablandırılması üçün isə "SİMA Rəqəmsal İmza" ilə qeydiyyatdan keçmək mümkündür.

e-social.gov.az portalı vasitəsilə elektron arayışları necə əldə etmək olar?

Elektron arayışların əldə edilməsi üçün e-social.gov.az portalında şəxsi kabinetə daxil olduqdan sonra "Arayış" bölməsinə keçid etmək lazımdır. Açılan "Arayışların əldə edilməsi" bölməsinin "Arayışın növü" hissəsindən arayışın müvafiq növü seçilir. Daha sonra tələb olunan digər məlumatlar daxil edilərək "Arayışı yüklə" düyməsi sıxılır.

Əldə edilmiş elektron arayışların həqiqiliyi necə yoxlanılır?

Əldə olunan arayışın həqiqiliyinin yoxlanılması da e-social.gov.az internet portalında aparılır. Bunun üçün:

1. Portalın əsas səhifəsində "Sənədlərin yoxlanılması" bölməsinə keçid edilir.
2. Açılan yeni səhifədə "arayışların yoxlanılması" düyməsi sıxılır.
3. Yeni pəncərədə arayışın üzərindəki nömrə müvafiq sahəyə daxil edilir və axtarış işarəsi sıxılır.

Nəticədə nömrəsi daxil edilən arayışın həqiqiliyi və qüvvədə olub-olmaması barədə məlumatlar əks olunur.

e-social.gov.az portal vasitəsilə elektron arayışları əldə etmək mümkün olmadıqda hara müraciət etmək olar?

Elektron arayışları e-social.gov.az portalı vasitəsilə əldə etmək mümkün olmadıqda istənilən "DOST" mərkəzinə müraciət etməklə müvafiq arayış əldə edilə bilər. Belə ki, şəxslər “DOST” mərkəzlərində quraşdırılmış özünəxidmət masalarında "Digital login" vasitəsilə portala giriş edərək müvafiq elektron arayışları əldə edə bilər. Həmçinin,  “DOST” mərkəzləri tərəfindən arayışların blankda təqdim edilməsi mümkündür. 

“DOST” mərkəzləri tərəfindən Əmək və Əhalinin Sosial Müdafiəsi Nazirliyinin fəaliyyət istiqamətləri üzrə arayışların verilməsi üçün hansı sənədlər tələb olunur?

Arayışların verilməsi üçün tələb olunan sənədlər:

1. Şəxsiyyəti təsdiq edən sənəd;
2. Müraciət nümayəndə vasitəsilə edildikdə nümayəndənin şəxsiyyət vəsiqəsi və onun səlahiyyətlərini təsdiq edən sənəd (etibarnamə və ya şəxsin qəyyum (himayəçi) olmasını təsdiq edən sənəd).