Həssas əhali qruplarından olan şəxslər üçün Sığınacaq və Sosial Reabilitasiya Müəssisəsi

Müəssisə barədə ümumi məlumat

Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin tabeliyində olan Həssas əhali qruplarından olan  şəxslər üçün Sığınacaq və Sosial Reabilitasiya Müəssisəsi (bundan sonra – Müəssisə) ictimai əhəmiyyət daşıyan fəaliyyətlə məşğul olub, baxımsız, kimsəsiz və sosial təhlükəli vəziyyətdə olan yetkinlik yaşına çatmayanların, müəyyən yaşayış yeri olmayan şəxslərin, məişət zorakılığından zərər çəkmiş şəxslərin, habelə görmə qabiliyyəti məhdudluğu olan 5-29 yaşlı şəxslərin (bundan sonra – şəxslər) sosial reabilitasiyasının həyata keçirilməsi, onlara sosial-hüquqi, tibbi-sosial, sosial-məişət xidmətlərinin, sosial-məsləhət yardımının göstərilməsi, həmçinin müəssisəyə stasionar formada qəbul edilmiş bu kateqoriyalardan olan şəxslərin reabilitasiya müddətində müvəqqəti yaşayış yeri ilə təmin olunması üçün nəzərdə tutulmuş yarımstasionar və stasionar sosial xidmətin göstərilməsini, qaynar xətt vasitəsi ilə həssas əhali qrupundan olan şəxslər üçün sosial-məsləhət xidmətinin təşkilini, həmçinin Azərbaycan Respublikası Əmək və Əhalinin Sosial Müdafiəsi Nazirliyinin fəaliyyət istiqamətlərinə uyğun digər sahələrdə xidmətlərin göstərilməsini təmin edən publik hüquqi şəxsdir.

Ünvanı

Müəssisə Bakı şəhəri, Sabunçu rayonu, Zabrat qəsəbəsi, Zabrat Pirşağı yolu 1-ci km. “33 A” ünvanında yerləşir.

Müəssisəyə kimlər qəbul edilir?

• baxımsız, kimsəsiz və sosial təhlükəli vəziyyətdə olan 4 yaşdan yuxarı yetkinlik yaşına çatmayan şəxslər;
• müəyyən yaşayış yeri olmayan 18 yaşdan yuxarı şəxslər;
• məişət zorakılığından zərər çəkmiş şəxslər;
• görmə qabiliyyəti məhdudluğu olan 5-29 yaşlı şəxslər.
  
  

Aşağıdakı şəxslər müəssisələrə qəbul edilmir:

Yoluxucu və psixi xəstəlikləri, həmçinin vaxtaşırı epileptik tutmaları olan şəxslər müəssisəyə qəbul edilmir.

Müəssisədə xidmət müddəti

Müəssisədə şəxslərin reabilitasiya müddəti 180 (yüz səksən) gündən çox olmamaqla müəyyən edilir (reabilitasiya prosesinin nəticəsindən asılı olaraq, Sosial Xidmətlər Agentliyinin razılığı ilə müddətin uzadılması halları istisna olmaqla).

Baxımsız, kimsəsiz və sosial təhlükəli vəziyyətdə olan yetkinlik yaşına çatmayanlar üzrə proses

Müəssisəyə qəbul üçün müraciətin edilməsi

Müəssisəyə qəbul edilmələri məqsədilə uşaqlar şəxsən özləri və ya şəhər, rayon polis orqanının və yetkinlik yaşına çatmayanların işləri və hüquqlarının müdafiəsi üzrə yerli komissiyanın səlahiyyətli nümayəndəsi, bələdiyyələr, qeyri-hökumət təşkilatları, habelə uşağın razılığı ilə digər şəxslər Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinə və ya “DOST” mərkəzlərinə müraciət edirlər.

Baxımsız və ya sosial təhlükəli vəziyyətdə olan yetkinlik yaşına çatmayanların dövlət sosial xidmət müəssisələrinə (sosial sığınacaq) yerləşdirilməsinə Azərbaycan Respublikası Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi tərəfindən “Yetkinlik yaşına çatmayanların baxımsızlığının və hüquq pozuntularının profilaktikası haqqında” Azərbaycan Respublikası Qanununun 11-ci maddəsinə uyğun olaraq aşağıda qeyd olunan sənədlər əsasında baxılır:

(Azərbaycan Respublikası Nazirlər Kabinetinin 2013-cü il 5 noyabr tarixli 320 nömrəli qərarı ilə təsdiq edilmiş “Çətin həyat şəraitində olan şəxslərin (ailələrin) dövlət sosial xidmət müəssisələrinə yerləşdirilməsi Qaydası”nın 2.3-cü bəndinə uyğun olaraq)

Müəssisədə göstərilən xidmətlər

Şəxslərin sosial reabilitasiyasının həyata keçirilməsi məqsədi ilə hər bir şəxs üçün müəssisə tərəfindən razılaşdırılmış sosial xidmət göstərilməsinə dair fərdi plan tərtib edilir. 

Müəssisə tərəfindən qəbul edilmiş şəxslərin sosial reabilitasiyası məqsədilə aşağıdakı tədbirlər həyata keçirilir:

• uşaqların ilkin tibbi müayinəsi və onlara ilkin tibbi yardımın göstərilməsi;
• uşaqların psixo-sosial vəziyyətinin ilkin qiymətləndirilməsi;
• stasionar müalicəyə ehtiyacı olan uşaqların müalicə-profilaktika müəssisələrinə göndərilməsinin təmin edilməsi;
• həkim rəyinə əsasən uşaqların dərman vasitələri və tibbi təyinatlı digər ləvazimatlarla təmin edilməsi;
• uşaqların emosional vəziyyətinə və davranışına nəzarət edilməsi;
• uşaqların depressiya vəziyyətindən çıxarılması, yaş xüsusiyyətlərinə, yaradıcılıq, intellektual və fiziki imkanlarına uyğun olaraq onlara psixoloji yardımın göstərilməsi;
• pedaqoji korreksiya üçün kompleks tədbirləri təşkil etmək məqsədilə uşağın normal və ya ictimai təhlükəli davranışını xarakterizə edən əlamətlərin öyrənilməsi, onun potensialının və meyillərinin, cəmiyyətdən təcrid olunmasının (əgər belə hal varsa) forma və dərəcəsinin  müəyyən edilməsi;
• uşaqların özünəqulluq, məişətdə və ictimai yerlərdə davranış, özünənəzarət və həyat fəaliyyətinin digər sahələrində bacarıqlarının artırılması;
• uşaqların dünyagörüşünün genişləndirilməsinə, ünsiyyət qabiliyyətinin artırılmasına, yaradıcılıq fəaliyyətinin inkişaf etdirilməsinə yönəlmiş tədbirlərin həyata keçirilməsi;
• uşaqların sadə əmək vərdişlərinə və müxtəlif peşələrə yiyələnməsinə köməklik göstərilməsi, müxtəlif peşələr və onların xüsusiyyətləri haqqında məlumatlandırmaqla, peşə meyillərinin aşkar edilməsi, peşəyönümlü məsləhətlərin verilməsi, əmək qabiliyyətli olduqda onların məşğulluqlarının təmin edilməsi məqsədilə müvafiq tədbirlərin görülməsi;
• fiziki və əqli qabiliyyətlərinə uyğun olaraq, uşaqların təhsil almalarına köməklik göstərilməsi məqsədilə müvafiq təhsil müəssisələrinə müraciət edilməsi və bu istiqamətdə təhsil müəssisələri ilə birgə tədbirlərin görülməsi;
• uşaqların mədəni-asudə vaxtının təşkili ilə əlaqədar müvafiq tədbirlərin həyata keçirilməsi;
• uşaqların hüquqlarının müdafiə edilməsi, onlara qarşı hüquq pozuntusu törətmiş şəxslərin müəyyən olunması üçün peşəkar yardımın göstərilməsi;
• sənədlərin (doğum haqqında şəhadətnamə, şəxsiyyət vəsiqəsi, işlə təmin olunması üçün lazım olan sənədlər və s.) əldə edilməsinə köməklik göstərilməsi.

Müəyyən yaşayış yeri olmayan şəxslər üzrə proses

Müəssisəyə qəbul üçün müraciətin edilməsi

Şəxslərin müəssisəyə qəbulu onların şəxsən və ya Azərbaycan Respublikasının daxili işlər orqanlarının və ya yerli icra hakimiyyəti orqanlarının və bələdiyyələrin belə şəxsləri müəyyənləşdirərək həmin orqanların səlahiyyətli nümayəndələrinin bu orqanların göndərişləri əsasında şəxslərin müəssisəyə qəbul edilməsi üçün Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinə və ya “DOST” mərkəzlərinə müraciətlərinə əsasən həyata keçirilir.

Müəssisədə göstərilən xidmətlər

• şəxslərin ilkin tibbi müayinəsi və onlara ilkin tibbi yardımın göstərilməsi;
• şəxslərin psixo-sosial vəziyyətinin ilkin qiymətləndirilməsi;
• stasionar müalicəyə ehtiyacı olan şəxslərin müalicə-profilaktika müəssisələrinə göndərilməsinin təmin edilməsi;
• həkim rəyinə əsasən şəxslərin dərman vasitələri və tibbi təyinatlı digər ləvazimatlarla təmin edilməsi;
• şəxslərin emosional vəziyyətinə və davranışına nəzarət edilməsi;
• sənədlərin (şəxsiyyət vəsiqəsi, əmlak məsələləri ilə bağlı sənədlər, işlə təmin olunması üçün lazım olan sənədlər və s.) əldə edilməsinə və itirilmiş sənədlərin bərpasına, habelə pensiya və digər sosial ödənişlərin alınmasına köməklik göstərilməsi;
• şəxslərin psixoloji zədələrinin aradan qaldırılması, sosial statuslarının bərpası, sosial adaptasiyası və cəmiyyətə inteqrasiyalarının təmin edilməsi məqsədilə psixo-sosial dəstək və məsləhət yardımının göstərilməsi;
• fiziki və əqli qabiliyyətlərinə uyğun olaraq, şəxslərin peşə hazırlığının, yenidən hazırlığının təşkili və məşğulluqlarının təmin edilməsinə köməklik göstərilməsi;
• şəxslərin mədəni-asudə vaxtının təşkili ilə əlaqədar müvafiq tədbirlərin həyata keçirilməsi;
• şəxslərə hüquqlarının müdafiə edilməsi məqsədilə hüquqi məsləhət yardımının, onlara qarşı hüquq pozuntusu törətmiş şəxslərin müəyyən olunması üçün peşəkar yardımın göstərilməsi.

Görmə qabiliyyəti məhdudluğu olan 5-29 yaşlı şəxslər üzrə proses

Müəssisəyə qəbul üçün müraciətin edilməsi

Müəssisəyə qəbul olunmaq üçün uşaqların valideynləri (və ya qohumları, digər qanuni nümayəndəsi (qəyyumu, himayəçisi), bələdiyyələr, qeyri-hökumət təşkilatları, habelə həmin şəxsin razılığı ilə digər şəxslər) Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinə və ya “DOST” mərkəzlərinə müraciət edirlər.

Müəssisədə göstərilən xidmətlər

• şəxslərin ilkin tibbi müayinəsi və onlara  ilkin  tibbi yardımın göstərilməsi;
• müəssisəyə stasionar formada qəbul edilmiş stasionar müalicəyə ehtiyacı olan şəxslərin müalicə-profilaktika müəssisələrinə göndərilməsinin təmin edilməsi;
• psixo-sosial vəziyyətin ilkin qiymətləndirilməsi və sosial-psixoloji yardımın göstərilməsi;
• 15-29 yaşlı şəxslərə brayl əlifbasının öyrədilməsi;
• ayaq hissiyyatının artırılması və əl ağacından istifadənin öyrədilməsi;
• fiziki və əqli qabiliyyətlərinə uyğun olaraq şəxslərin peşə hazırlığının və yenidən hazırlığının təşkili;
• şəxslərin mədəni-asudə vaxtının təşkili ilə əlaqədar müvafiq tədbirlərin həyata keçirilməsi.

Məişət zorakılığından zərər çəkmiş şəxslər üzrə proses

Məişət zorakılığından zərər çəkmiş şəxslərin sosial reabilitasiyası və sosial müdafiəsinin təşkil edilməsi

Məişət zorakılığından zərər çəkmiş şəxslər (bundan sonra - zərər çəkmiş şəxslər) sosial-hüquqi, tibbi-sosial, sosial məişət xidmətlərinin, habelə sosial-məsləhət yardımının göstərilməsi məqsədi ilə yardım mərkəzlərinə qəbul edilirlər.

Yardım mərkəzlərində şəxsiyyətin konfidensiallığı təmin edilməklə, zərər çəkmiş şəxsin xahişi (razılığı) ilə ona zəruri yardım göstərilir, müvəqqəti sığınacaqla, geyim və qida məhsulları ilə təmin olunur, habelə psixoloji reabilitasiya və psixoloji korreksiya kursunun aparılması məqsədi ilə müvafiq icra hakimiyyəti orqanına məlumat göndərilir.

Yardım mərkəzlərinin fəaliyyət istiqamətlərinə zərər çəkmiş şəxslərə psixoloji və hüquqi yardımın göstərilməsi, pozulmuş və yaxud itirilmiş funksiyaların bərpasına yönəlmiş müalicəvi tədbirlərin həyata keçirilməsi, onların zorakılıqdan aldıqları xəsarətlər nəticəsində yaranmış psixoloji, fizioloji və anatomik pozuntularının tam və ya qismən bərpa edilməsi, habelə zərər çəkmiş şəxslərin müvəqqəti sığınacaqla təmin edilməsi və onların ailələrində normal həyat tərzinin bərpa edilməsi üçün tədbirlərin həyata keçirilməsi daxildir.

Yardım mərkəzlərində həmçinin zərər çəkmiş şəxslərin işlə təmin edilmələrinə, yeni peşələrə yiyələnmələrinə, habelə zərər çəkmiş şəxslərin sosial müdafiəsi üçün müvafiq sənədlərin hazırlanmasına və sosial ödənişlərin alınmasında müvafiq köməklik göstərilir.

Zərər çəkmiş şəxslərin müvəqqəti sığınacaqla təmin edilməsi və onların ailələrində normal həyat tərzinin bərpa edilməsi üçün tədbirlərin həyata keçirilməsi də Yardım mərkəzlərinin fəaliyyət istiqamətlərinə daxildir.

Yardım mərkəzlərində reabilitasiya tədbirləri qəbul edilmiş hər bir şəxs üçün tərtib edilmiş fərdi sosial reablitasiya planına əsasən həyata keçirilir.

Yardım mərkəzləri tərəfindən göstərilən bütün xidmətlər ödənişsizdir.

Müəssisəyə qəbul üçün müraciətin edilməsi

Müəssisəyə qəbul olunmaq üçün şəxslər, habelə həmin şəxsin razılığı ilə qohumları, qanuni nümayəndəsi (qəyyumu, himayəçisi), bələdiyyələr, qeyri-hökumət təşkilatları və ya digər şəxslər Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinə və ya “DOST” mərkəzlərinə müraciət edirlər.

Müəssisədə göstərilən xidmətlər

• Şəxslərin ilkin tibbi müayinəsi və onlara ilkin  tibbi yardımın göstərilməsi;
• Şəxslərin psixoloji və emosional vəziyyətinin ilkin qiymətləndirilməsi;
• Şəxslərin pozulmuş və yaxud itirilmiş funksiyalarının bərpasına, xəstəliklərinin və alınmış xəsarətlərin nəticələrini aradan qaldırılmasına, psixoloji, fizioloji və anatomik pozuntularının tam və ya qismən bərpa edilməsinə yönəlmiş tədbirlərin həyata keçirilməsi;
• Şəxslərin psixoloji zədələrinin aradan qaldırılması, sosial statuslarının bərpası, sosial adaptasiyası və cəmiyyətə inteqrasiyalarının təmin edilməsi məqsədilə psixo-sosial dəstək və məsləhət yardımının göstərilməsi;
• Şəxslərə hüquqlarının müdafiə edilməsi məqsədilə hüquqi məsləhət yardımının, onlara qarşı hüquq pozuntusu törətmiş şəxslərin müəyyən olunması üçün peşəkar yardımın göstərilməsi;
• Şəxslərin sosial müdafiəsi üçün müvafiq sənədlərin hazırlanmasında və ya sosial müavinətlərin alınmasında köməklik göstərilməsi;
• Şəxslərin işlə təmin edilmələrinə, yeni peşələrə yiyələnmələrinə köməklik göstərilməsi;
• Şəxslərin müvəqqəti sığınacaqla təmin edilməsi;
• Şəxslərin mədəni-asudə vaxtının təşkili ilə əlaqədar müvafiq tədbirlərin həyata keçirilməsi;
• Şəxslərin ailələrində normal həyat tərzinin bərpa edilməsi üçün müvafiq tədbirlərin həyata keçirilməsi.