Asan Aç

"DOST" İş Mərkəzi

 "İşsizin dostu" proqramı

Azərbaycan Respublikasının Prezidenti cənab İlham Əliyevin tapşırığına əsasən 2019-cu ilin əvvəlindən ictimai işlərin təşkili ilə bağlı yeni mexanizmi nəzərdə tutan “İşsizin dostu” proqramına başlanılıb. Həmin proqram Əmək və Əhalinin Sosial Müdafiəsi Nazirliyinin tabeliyində olan Dayanıqlı və Operativ Sosial Təminat Agentliyinin törəmə cəmiyyəti olan “DOST İş Mərkəzi” MMC tərəfindən icra olunur. Haqqı ödənilən ictimai işlər proqramı ilkin peşə, ixtisas hazırlığı olmayan işçi qüvvəsinin işlə təminatına imkan yaratdığı kimi, onların müxtəlif peşə sahələri üzrə bilik və bacarıqlara yiyələnmiş işçi qüvvəsinə çevrilməsinə də şərait yaradır.

Proqramın icrası çərçivəsində “DOST İş Mərkəzi” MMC tərəfindən 38 min şəxs ödənişli ictimai işlərə cəlb edilib. 2020-ci ildə yeni növ koronavirus (COVID-19) pandemiyası ilə əlaqədar məşğulluğa və sosial rifaha dəstək işləri çərçivəsində dövlət başçısının tapşırığı ilə ictimai iş yerlərinin sayı 90 minə çatdırılıb. Yəni, əlavə olaraq ötən il 50 mindən çox şəxs 2 aylıq müvəqqəti ictimai iş yerləri ilə təmin edilib.

2021-ci ilin yanvar ayından iri dövlət müəsisələri tərəfindən 17 minə yaxın içtimai iş yeri “DOST İş Mərkəzi” MMC-yə ötürülüb. Həmin işlərdə çalışan şəxslərlə bağlanılan bütün mülki-hüquqi müqavilələr “DOST İş Mərkəzi” MMC tərəfindən artıq əmək müqaviləsi ilə əvəz edilib. Bu da həmin şəxslərin gələcək əmək və sosial təminat, pensiya, məzuniyyət hüquqlarının, həmçinin sosial sığorta sistemində iştirak etmək imkanlarının yaranmasına səbəb olur. İctimai işçilər əmək qanunvericiliyinə uyğun olaraq məzuniyyət hüququndan istifadə edir.

Məşğulluq imkanlarının artırılmasında mühüm rol oynayan haqqı ödənilən ictimai işlər proqramında sosial cəhətdən həssas qruplardan olan vətəndaşlara, o cümlədən əlilliyi olan şəxslərə üstünlük verilir. Haqqı ödənilən ictimai işlərdə iştirak etmək istəyən şəxslərlə Azərbaycan Respublikasının Əmək Məcəlləsinə uyğun olaraq müddətli əmək müqaviləsi bağlanır.

"İşsizin dostu" proqramına necə qoşulmaq olar?

Proqram çərçivəsində haqqı ödənilən ictimai işlərə Əmək və Əhalinin Sosial Müdafiəsi Nazirliyinin Mərkəzləşdirilmiş Elektron İnformasiya Sisteminin (MEİS) “Məşğulluq” altsistemində (MAS) işsiz və işaxtaran kimi qeydiyyatda olan şəxslər haqqı ödənilən ictimai işlər üçün müraciət edə bilər.

“DOST” mərkəzlərinin və ya Dövlət Məşğulluq Agentliyinin yerli qurumlarının müvafiq göndərişi əsasında həmin şəxslə “DOST İş Mərkəzi” MMC tərəfindən əmək müqaviləsi bağlanılır. Hər bir əmək müqaviləsi də bildiriş formasında Nazirliyin “Əmək müqaviləsi bildirişi” üzrə elektron informasiya sistemində qeydiyyatdan keçirilərək rəsmiləşdirilir.

"İşsizin dostu" proqramına cəlb olunan işsiz şəxslərə əsasən hansı işlər təklif olunur?

“İşsizin dostu” proqramına qoşulmaq istəyənlərə şəhər, rayon ərazisinin, küçə, park və meydanların abadlaşdırılması, yaşayış əraziləri, xəstəxana, məktəb, məktəbəqədər təhsil müəssisələri, yataqxana və pansionatlar, ahıllar və əlilliyi olan şəxslər üçün sosial xidmət müəssisələri, habelə sosial sferanın digər obyektlərində tikinti və təmir işləri, yol və körpülərin, istilik və qazanxana sistemlərinin təmiri və tikintisi, kənd təsərrüfatı müəssisələrinə kömək göstərilməsi ilə əlaqədar işlər, təbii fəlakətlərin nəticələrinin aradan qaldırılması işləri, qocalara, əlilliyi olan şəxslərə qulluq, digər sosial əhəmiyyətli işlər təklif olunur.

Layihələr

Aqrar İnkişaf mərkəzi ilə “DOST İş Mərkəzi” MMC arasında 2020-ci ildə saziş imzalanıb. Sazişə əsasən epizootiya əleyhinə profilaktika tədbirlərinin həyata keçirilməsi və "Elektron Kənd Təsərrüfatı İnformasiya Sistemi"nin tətbiq edilməsi üçün “DOST İş Mərkəzi” MMC Kənd Təsərrüfatı Nazirliyini 2500-ə yaxın işçi ilə təmin edib. Ümumilikdə, ictimai işlər proqramı üzrə 500-ə yaxın şəxs “e-kənd təsərrüfatı” informasiya sistemi üzrə işlərlə təmin edilib.

Postmüharibə dövründə şəhid ailəsi üzvləri və qazilərin işlə təminatına üstünlük verilir.

Postmüharibə dövründə “DOST İş Mərkəzi” MMC tərəfindən 520 nəfərin məşğulluq məsələləri operativ həll olunub. Onlar əmək müqavilələri əsasında haqqı ödənilən ictimai işlərlə təmin olunublar. "Məşğulluq marafonu" çərçivəsində isə 100 nəfərə yaxın şəxs “DOST İş Mərkəzi” MMC tərəfindən işlə təmin edib.

YAŞAT Fondunun şəhid ailələri və qazilərlə bağlı tədbirlərinə əlavə dəstəyin göstərilməsi məqsədilə “DOST İş Mərkəzi” MMC tərəfindən 150 nəfər işlə təmin edib. “İşsizin dostu” proqramı çərçivəsində 150 sosial işçi Bakı və regional ASAN Xidmət mərkəzlərinə təhkim edilmişdir.

“DOST İş Mərkəzi” MMC tərəfindən icra olunan haqqı ödənilən ictimai işlər proqramı Hərbi Qənimətlər Parkını da əhatə etmişdir. Belə ki, parkın sanitar-gigiyenik qaydalara uyğun qorunub saxlanılması, park ərazisində cari abadlıq işlərinin mütəmadi yerinə yetirilməsi məqsədi ilə “DOST İş Mərkəzi” MMC tərəfindən 40 nəfər işlə təmin edilib.

“DOST İş Mərkəzi” MMC və Dövlət Məşğulluq Agentliyinin birgə həyata keçirdiyi “Təbiəti qoruyaq” adlı məşğulluq layihəsinə 800 nəfər cəlb edilib. Layihə çərçivəsində yaşıllıqlara xidmət göstərilməsi, təmizlik və abadlıq işlərinin həyata keçirilməsi nəzərdə tutulub. Hazırda ictimai işçilərin sayı 56 min nəfər təşkil edir.

 

© 2021 DOST - Dayanıqlı və Operativ Sosial Təminat Agentliyi