Sosial xidmət müəssisələrinə yerləşdirilmə Azərbaycan Respublikası Nazirlər Kabinetinin 2013-cü il 5 noyabr tarixli 320 nömrəli qərarı ilə təsdiq edilmiş “Çətin həyat şəraitində olan şəxslərin (ailələrin) dövlət sosial xidmət müəssisələrinə yerləşdirilməsi Qaydası”na əsasən tənzimlənir.
Sosial xidmət müəssisələri - mülkiyyət növündən və təşkilati-hüquqi formasından asılı olmayaraq çətin həyat şəraitində olan şəxslərə sosial xidmətin ayrı-ayrı formalarına və növlərinə uyğun sosial xidmətin göstərilməsi məqsədilə qanunla müəyyən edilmiş qaydada yaradılmış publik hüquqi şəxslərdir.
Əmək və Əhalinin Sosial Müdafiəsi Nazirliyinin tabeliyində aşağıdakı sosial xidmət müəssisələri fəaliyyət göstərir:
Məzun evi
Müəssisə dövlət uşaq müəssisələrinin valideyn himayəsindən məhrum olmuş, yaşayış sahəsi olmayan məzunlarının yaşaması üçün yaradılmışdır. Müəssisəyə valideyn himayəsindən məhrum olmuş və yaşayış yeri olmayan dövlət uşaq müəssisələrinin məzunları, onların öz istəkləri nəzərə alınmaqla, qəbul edilirlər.
Ünvan: Abşeron rayonu, Masazır kəndi, “Duz zavodu” yolu, 2-ci massiv, ev 1
Əlilliklə əlaqədar özünəqulluq qabiliyyəti olmayan şəxslərin sosial xidmət müəssisələri
Əlilliyi olan şəxslər üçün ixtisaslaşdırılmış sosial xidmət müəssisələri irqindən, etnik mənsubiyyətindən, dinindən, dilindən, cinsindən və mənşəyindən asılı olmayaraq, psixi və yüngül formalı əqli pozuntuları ilə əlaqədar əlilliyi yaranan və əlilliklə əlaqədar özünəqulluq qabiliyyəti, habelə qulluq və kömək edə biləcək əmək qabiliyyətli qohumları və ya qanuni nümayəndələri olmayan 18 yaşdan yuxarı şəxslərə (bundan sonra -şəxslər) sosial xidmətlərin göstərilməsi, onların sosial reabilitasiyasının və abilitasiyasının həyata keçirilməsi üçün nəzərdə tutulmuş stasionar sosial xidmət müəssisələridir.
Bu istiqamətdə aşağıdakı 4 ixtisaslaşdırılmış sosial xidmət müəssisəsi fəaliyyət göstərir:
Ünvan:
1 saylı Psixonevroloji Sosial Xidmət Müəssisəsi - Bakı şəhəri, Xəzər rayonu, Buzovna qəs., Beynəlminəl küç 20/22
2 saylı Psixonevroloji Sosial Xidmət Müəssisəsi- Şamaxı şəhəri, N.Nərimanov küç. 14
3 saylı Psixonevroloji Sosial Xidmət Müəssisəsi- Göygöl rayonu, Qırıxlı kəndi
4 saylı Psixonevroloji Sosial Xidmət Müəssisəsi- Gəncə şəhəri, Kəpəz rayonu, Qurtuluş küç. 76
Ahıllıqla əlaqədar özünəqulluq qabiliyyəti olmayan şəxslərin sosial xidmət müəssisəsi
Ahıl şəxslər üçün ixtisaslaşdırılmış sosial xidmət müəssisələri irqindən, etnik mənsubiyyətindən, dinindən, dilindən, cinsindən və mənşəyindən asılı olmayaraq, özünəqulluq qabiliyyəti, habelə qulluq və kömək edə biləcək əmək qabiliyyətli qohumları və ya qanuni nümayəndələri olmayan pensiya yaşına çatmış şəxslərə sosial xidmətlərin göstərilməsi və onların sosial reabilitasiyasının həyata keçirilməsi üçün nəzərdə tutulmuş stasionar sosial xidmət müəssisəsidir. Müəssisəyə özünəqulluq qabiliyyətini tamamilə və ya qismən itirmiş, digər müəssisə sakinlərinin həyat və sağlamlığına təhlükə yarada biləcək psixi və əqli pozuntusu və ya yoluxucu xəstəliyi olmayan, habelə qulluq və kömək edə biləcək əmək qabiliyyətli yaxın qohumları və ya qanuni nümayəndələri olmayan ahıl şəxslər qəbul edilirlər. 1941–1945-ci illər Böyük Vətən müharibəsi iştirakçıları, Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi zamanı əlil olmuş şəxslər və şəhid ailəsi üzvləri müəssisəyə ilk növbədə qəbul edilirlər.
Ünvan: Bakı şəhəri, Sabunçu rayonu, Bilgəh qəsəbəsi, H.Hacıağa küçəsi 24.
Əliliyi olan şəxslərin Peşə-əmək Reabilitasiyası Mərkəzi
Əlilliyi olan şəxslərin Peşə-əmək reabilitasiya mərkəzi irqindən, etnik mənsubiyyətindən, dinindən, dilindən, cinsindən və mənşəyindən asılı olmayaraq, fiziki və yüngül formalı əqli və psixi pozuntuları olan 15-29 yaşlı əlilliyi olan şəxslərin peşə-reabilitasiyasının həyata keçirilməsi və həmin müddət ərzində yaşaması, onlara sosial-məişət və tibbi-sosial xidmətlərin göstərilməsi üçün nəzərdə tutulmuş stasionar sosial xidmət müəssisəsidir.
Ünvan: Bakı şəhəri, Sabunçu rayonu, Ramana qəsəbəsi, Q.Qarayev küçəsi 14.
Həssas əhali qruplarından olan şəxslərin Sığınacaq və Sosial Reabilitasiya Müəssisəsi
Həssas əhali qruplarından olan şəxslər üçün Sığınacaq və Sosial Reabilitasiya Müəssisəsi baxımsız, kimsəsiz və sosial təhlükəli vəziyyətdə olan yetkinlik yaşına çatmayanların və müəyyən yaşayış yeri olmayan 18 yaşından yuxarı şəxslərin sosial reabilitasiyasının təşkili, görmə qabiliyyəti məhdudluğu olan şəxslərin sosial reabilitasiyasının və abilitasiyasının həyata keçirilməsi və müəssisəyə stasionar formada qəbul edilmiş bütün bu kateqoriyalardan olan şəxslərin reabilitasiya müddətində müvəqqəti yaşayış yeri ilə təmin olunması, həmçinin müəssisəyə qəbul edilmiş şəxslərə sosial-hüquqi, tibbi-sosial, sosial-məişət xidmətlərinin, sosial-məsləhət yardımının göstərilməsi üçün nəzərdə tutulmuş sosial xidmət müəssisəsidir.
Müəssisə aşağıdakı şəxslər üçün ixtisaslaşmış sosial xidmət müəssisəsidir:
Müəssisədə reabilitasiya müddəti 90 gündür.
Ünvan: Bakı şəhəri, Sabunçu rayonu, Zabrat qəsəbəsi, Zabrat Pirşağı yolu 1-ci km. “33”.
Təhsilə cəlb olunmayan 18 yaşınadək əlilliyi müəyyən edilmiş şəxslər üçün sosial xidmət müəssisəsi
Təhsilə cəlb olunmayan 18 yaşınadək əlilliyi müəyyən edilmiş şəxslər üçün ixtisaslaşdırılmış sosial xidmət müəssisələri irqindən, etnik mənsubiyyətindən, dinindən, dilindən, cinsindən, mənşəyindən asılı olmayaraq 5-18 yaşlı təhsilə cəlb olunmayan psixi və yüngül formalı əqli pozuntuları olan 18 yaşınadək əlilliyi müəyyən edilmiş şəxslərə sosial xidmətlərin göstərilməsi, onların sosial reabilitasiyalarının həyata keçirilməsi üçün nəzərdə tutulmuş stasionar sosial xidmət müəssisələridir.
Bu istiqamətdə 2 sosial xidmət müəssisəsi fəaliyyət göstərir:
Ünvan:
1 saylı 18 yaşınadək əlilliyi müəyyən edilmiş şəxslər üçün sosial xidmət müəssisəsi - Bakı şəhəri, Xəzər rayonu, Mərdəkan qəsəbəsi, M. Əzizbəyov küçəsi 84.
2 saylı 18 yaşınadək əlilliyi müəyyən edilmiş şəxslər üçün sosial xidmət müəssisəsi - Abşeron rayonu, Saray qəsəbəsi, M.Ə.Sabir küçəsi 17.
Yoluxucu və onkoloji xəstəlikləri, habelə ayda 5 dəfədən çox qıcolma ilə müşayiət olunan epilepsiya xəstəliyi və ürəkkeçmə sindromu olan uşaqlar müəssisəyə qəbul edilə bilməzlər.
© 2024 DOST - Dayanıqlı və Operativ Sosial Təminat Agentliyi
