Əlilliyi olan gənclərin əmək bazarının tələblərinə uyğun işçi qüvvəsinə çevrilməsi istiqamətində tədbirlər görülür

5 saylı Bakı DOST Mərkəzində növbəti təlim görüşü baş tutub. Görüşdə Tələbələrin Akselerasiya Proqramına (TAP) cəlb olunan Bakı və Sumqayıt şəhərləri üzrə 20-yə yaxın universitetin tələbə və məzunları, peşəkar təlimçilər və layihə komandası iştirak edib. Tədbir DOST Agentliyi, UNICEF Azərbaycan və Dövlət Məşğulluq Agentliyinin birgə tərəfdaşlığı ilə həyata keçirilən “Əlilliyi olan gənclərin sosial-iqtisadi fəallığına dəstək” layihəsi çərçivəsində keçirilib.

Təlim zamanı iştirakçılara ünsiyyət, əməkdaşlıq, şəxslərarası münasibətlər, təşkilatçılıq, emosional intellekt, analitik düşünmə, konfliktlərin idarə olunması kimi müxtəlif bacarıqların aşılanması istiqamətində interaktiv tapşırıqlar yerinə yetirilib.

Məqsəd əlilliyi olan gənclərin əmək bazarının tələblərinə uyğun işçi qüvvəsinə çevrilməsi, məşğulluq imkanlarının və bacarıqlarının artırılması, müvafiq təcrübə imkanlarının yaradılması, əlilliklə bağlı cəmiyyətdə mövcud olan mənfi davranış və stereotiplərin dəyişdirilməsidir.

Qeyd edək ki, layihə UNICEF-in Azərbaycan üzrə “2021-2025-ci illər üçün ölkə proqramı” və UNICEF Azərbaycan ilə Əmək və Əhalinin Sosial Müdafiəsi Nazirliyi arasında imzalanmış “Sosial müdafiə və uşaq müdafiəsi üzrə 2023-2024-cü illər üçün dövri fəaliyyət planı”na əsasən icra edilir.