“Könüllü DOST” proqramının “DigiDOST” və “TeleDOST” altproqramlarının təqdimatı keçirilib

DOST Agentliyində “Könüllü DOST” proqramının “DigiDOST” və “TeleDOST” altproqramlarının təqdimatı keçirilib.

Tədbirdə DOST Agentliyi haqqında, eləcə də DOST mərkəzində könüllülük fəaliyyəti barədə məlumat verilib, həmçinin bəzi statistik yeniliklər diqqətə çatdırılıb.

Agentliyin İnsan resurslarının idarə edilməsi departamentinin Könüllülərlə iş şöbəsinin müdiri Solmaz Həsənova yeni altproqramlar barədə təqdimatla çıxış edib.

Bildirilib ki, hazırda “Könüllü DOST” proqramı çərçivəsində 5 altproqram (“Gənc DOST”, “Gümüşü DOST”, “Korporativ DOST”, “İnklüziv DOST”, “Distant DOST”) icra edilməkdədir. DOST Agentliyinin əhatə dairəsinin genişləndiyini və yeni istiqamətlər üzrə fəaliyyətlərin icra olunduğunu nəzərə alaraq “Könüllü DOST” proqramı daxilində növbəti 2 yeni – “DigiDOST” və “TeleDOST” altproqramlarının yaradılıb.

“DigiDOST” altproqramının iştirakçıları DOST Rəqəmsal İnnovasiyalar Mərkəzinin fəaliyyət sahələrində uyğun sorğuların cavablandırılması, məlumat bazaları ilə iş, proseslərin təkmilləşdirilməsi, rəqəmsal savadlılığın artırılması və s. istiqamətlərdə fəaliyyət göstərəcəklər.

“TeleDOST” altproqramı çərçivəsində isə DOST TV-də xəbər xülasələrinin hazırlanması, müxtəlif veriliş və layihələrin təşkili, vətəndaş müraciətlərin araşdırılması və s. istiqamətlər üzrə könüllülərin cəlb edilməsi nəzərdə tutulur.