Bu gün DOST TV-nin 1 yaşı tamam olur

Ölkəmizdə ilk sosial və inklüziv televiziya nümunəsi olan DOST TV-nin bu gün 1 yaşı tamam olur. 

DOST Konsepsiyasının televiziya həlli olaraq “Youtube” kanalı kimi fəaliyyətə başlayan DOST TV elə ilk günlərdən sosial həyatın ekranına çevrilib. 

İş günlərində canlı yayımlanan DOST TV əmək, məşğulluq, sosial müdafiə sahələrində aparılan ardıcıl islahatlar, tətbiq olunan innovativ yeniliklər, yeni sosial layihələr barədə ictimai məlumatlandırmaya öz töhfələrini verir. 

Ölkənin sosial həyatı ilə bağlı mühüm tədbirlərin canlı yayımını da həyata keçirən DOST TV-də “DOST Xəbər”, “DOST qapısı”, “Sosial saat”, “Qayğı”, “Ekspert rəyi”, “İş saatı”, “Mənim hekayəm”, “Rəqəmsal saat”, “Xidmətinizdəyik”, “Birlikdə öyrənək”, “Onlayn müfəttiş”, “Dayaq nöqtəsi”, “DOST podcast”, “HR talks podcast”, “Gənclər dostluğu” və s. kimi sosial mövzularda maraqlı verilişlər yayımlanır. 

Sosial reklamlar, infoqrafikalar və maarifləndirici çarxlar da gündəlik olaraq bu kanalın efirində təqdim edilir. Eyni zamanda, DOST TV-də aidiyyəti qurumlarla əməkdaşlıqda yeni birgə verilişlər də yayımlanır və “Dövlət işi”, “Sığorta vaxtı” bunun ilk və maraqlı nümunələridir.

DOST TV həmçinin Əmək və Əhalinin Sosial Müdafiəsi Nazirliyi  əməkdaşlarının, vətəndaş cəmiyyəti institutlarının, ekspertlərin sosial mövzularda təhlil, diskussiya və müzakirə platformasıdır. Bu televiziya eyni zamanda vətəndaşların sosial mövzularda müraciətlərinin birbaşa cavablandırılmasına, göndərdikləri videomüraciətlərdə əksini tapan sosial məsələlərin araşdırılması və həllinə dəstək olur. 

DOST TV-nin “Surdo-İnfo”, “İnklüziv cəmiyyət üçün birlikdə öyrənək!” adlı layihələri, surdotərcümə ilə film və tamaşalar təqdim etməsi, DOST İnklüziv İnkişaf və Yaradıcılıq Mərkəzinin benefisiarlarının bacarıqlarının, yaradıcılıq nümunələrinin cəmiyyətə tanıdılması istiqamətində gördüyü işlər, bu mövzuda yayımladığı uğur hekayələri, paralimpiya xəbərlərinə daim geniş yer ayırması və s. onun inklüziv cəmiyyətin inkişafına fəal dəstək məramını ifadə edir. 

Bu kanalın “Mənim hekayəm” adlı verilişinin iki aparıcısından biri də əlilliyi olan şəxsdir.

İzləyici auditoriyasını daim genişləndirən DOST TV-yə gələcək fəaliyyətində yeni-yeni nailiyyətlər arzulayırıq!