“DOST Çağrı Mərkəzi 142”-nin fəaliyyəti müzakirə olundu

Cari ilin fevral ayında "DOST Çağrı Mərkəzi 142"-yə 130 mindən çox zəng daxil olub. Xidmətlə bağlı məmnunluq səviyyəsi isə 95% təşkil edib. Bu barədə qurumun fəaliyyəti ilə bağlı keçirilən iclasda bildirilib.

Onlayn formatda baş tutan görüşdə Çağrı Mərkəzinin hesabat dövrü ərzində fəaliyyətini özündə əks etdirən təqdimat nümayiş olunub və görülən işlər barədə məlumat verilib.

Qeyd olunub ki, Çağrı Mərkəzinə zəng edən vətəndaşlar üçün operatorun cavabını gözləmə müddəti 12 saniyə, xidmət müddəti isə 2 dəqiqə 45 saniyə təşkil edib.

Sonda DOST Agentliyinin İdarə Heyətinin sədri Fərid Məmmədov təqdimatla bağlı fikirlərini bildirib, müvafiq tapşırıqlar verib. Gələcəkdə atılacaq addımlar barədə müzakirələr aparılıb.