DOST Agentliyində Beynəlxalq İKT-də Qızlar Günü ilə bağlı təlim keçirilib. DOST Rəqəmsal İnnovasiyalar Mərkəzinin (RİM) təşəbbüsü ilə keçirilən təlimdə “Könüllü DOST” proqramının 30-dan çox xanım nümayəndəsi iştirak edib. Məqsəd gənc xanım könüllüləri informasiya-kommunikasiya texnologiyaları (İKT) sahəsinə cəlb etmək, onların bu sahədə fəaliyyətini stimullaşdırmaqdır.
Təlimə DOST Agentliyi və DOST RİM-də çalışan peşəkar xanım mütəxəssislər cəlb edilib. Onlar təqdimatla çıxış edərək çalışdıqları struktur bölmələrdəki fəaliyyət istiqamətləri, eyni zamanda İKT-də qadınların rolu və şəxsi uğur hekayələri barədə məlumat veriblər. Təlimdə İKT-də gender bərabərliyinin qadınların hüquq və imkanlarının genişləndirilməsində əsas amillərdən biri olduğu qeyd edilib.
İştirakçıların böyük marağına səbəb olan bir günlük təlim sual-cavab sessiyası ilə işini yekunlaşdırıb.
Qeyd edək ki, Beynəlxalq Telekommunikasiya İttifaqı tərəfindən təsis edilən Beynəlxalq İKT-də Qızlar Günü hər il aprel ayının dördüncü həftəsinin dördüncü günü keçirilir.
