Xalq yazıçısı Çingiz Abdullayevlə görüş keçirilib

DOST Agentliyinin təşəbbüsü ilə yaradılan “Ahıllar Klubu”nun növbəti tədbiri keçirilib. 5 saylı Bakı DOST Mərkəzində baş tutan görüşün bu dəfəki qonağı xalq yazıçısı Çingiz Abdullayev olub.

Çingiz Abdullayev əvvəlcə Mərkəzdə əhaliyə göstərilən xidmətlərlə tanış olub. Ona DOST mərkəzlərinin fəaliyyəti və iş prinsipi barədə məlumat verilib.

Daha sonra “Ahıllar Klubu”nun üzvləri ilə keçirilən görüşdə xalq yazıçısı klub üzvləri ilə səmimi söhbət edib, onları maraqlandıran sualları cavablandırıb. DOST Agentliyi tərəfindən evdə (səyyar) sosial xidmətlər göstərilən İzzət Əhmədova qonağa müəllifi olduğu "Əyləncəli riyaziyyat" kitabını hədiyyə edib.

Qeyd edək ki, “Ahıllar Klubu” DOST mərkəzləri üzrə evdə (səyyar) sosial xidmətlər göstərilən şəxslərin sosial aktivliyə cəlb edilməsi məqsədi ilə yaradılıb. Bununla bağlı Agentlik tərəfindən mütəmadi olaraq müxtəlif tədbirlər keçirilir.