Ulu Öndər Heydər Əliyevin 100 illik yubileyinə həsr olunan elmi-praktiki konfrans keçirilib
Bakı Dövlət Universitetində Ümummilli Lider Heydər Əliyevin 100 illiyi və Dayanıqlı və Operativ Sosial Təminat - DOST Agentliyinin yaradılmasının 5 illiyi münasibətilə "Sosial sahədə müasir dövlət xidmətlərinin formalaşmasının elmi paradiqması" mövzusunda elmi-praktiki konfrans keçirilib.
Tədbirdən öncə iştirakçılar Ulu Öndər Heydər Əliyevin büstü önünə gül dəstələri düzərək, ümummilli liderin əziz xatirəsinə ehtiramlarını ifadə ediblər.
BDU-nun rektoru Elçin Babayev tədbir iştirakçılarını salamlayaraq, konfrans haqqında məlumat verib. Bildirib ki, DOST Agentliyi və BDU-nun birgə təşkilatçılığı ilə baş tutan konfransda hüquq elmləri, sosiologiya, iqtisad elmləri və digər sahələr üzrə məqalə və tezislər qəbul olunub.
Əmək və əhalinin sosial müdafiəsi nazirinin müavini Anar Əliyev Ulu Öndər Heydər Əliyevin 100 illiyi münasibətilə keçirilən konfransın əhəmiyyətini vurğulayıb. O qeyd edib ki, konfransda sosial sahədə müasir dövlət xidmətlərinin təşkili, “bir pəncərə” konsepsiyası, sosial xidmətlərin xəritələnməsi, xidmətlərin rəqəmsal platformaya daşınması və s. mövzularda qəbul edilən məqalə və tezislər bu istiqamətlərdə aparılan tədqiqatlar üçün yol xəritəsi olacaq.
Tədbirdə, fəxri qonaq qismində iştirak edən Milli Məclisin İnsan hüquqları komitəsinin sədri Zahid Oruc, Bakı Slavyan Universitetinin rektoru Anar Nağıyev, Əmək və Əhalinin Sosial Müdafiəsi Nazirliyi yanında İctimai Şuranın sədri Elşad Məmmədov və BDU-nun Əmək və ekologiya hüququ kafedrasının professoru Mayis Əliyev Ulu Öndər Heydər Əliyevin sosial siyasəti, bu sahənin formalaşması və inkişafı ilə bağlı həyata keçirdiyi islahatlar barədə danışıb, elmi-praktiki konfransın işində uğurlar arzulayıblar.
Tədbirdə Ümummilli Lider Heydər Əliyevin 100 illiyi və DOST Agentliyinin 5 illiyinə dair videoçarx nümayiş olunub.
DOST Agentliyinin İdarə Heyətinin sədri Fərid Məmmədov Agentliyin fəaliyyətinə dair təqdimatla çıxış edib. Təqdimatda sosial sahə üzrə beynəlxalq səviyyədə olan nəzəri modellər, onların detalları və tətbiqi ilə bağlı məlumatlar əks olunub. Eyni zamanda "bir pəncərə" sistemi, bu barədə dünya təcrübəsi və DOST modelinin bu təcrübədə yeri haqqında geniş informasiya verilib.
Daha sonra "Sosial sahədə müasir dövlət xidmətlərinin formalaşmasının elmi paradiqması" mövzusunda keçirilən elmi-praktiki konfransda iştirak edən spikerlərin çıxışları dinlənilib.
Məruzələr konfrans iştirakçıları tərəfindən böyük maraqla qarşılanıb.
Konfransın sonunda iştirakçılara sertifikatlar təqdim olunub.
