Sosial iş yerləri üzrə əməkhaqlarının qismən maliyyələşdirilməsi

Agentliyin yerli qurumlarına və ya “DOST” mərkəzlərinə müraciət edən şəxs götürdüyü sıra nömrəsinə uyğun olaraq müvafiq masaya yaxınlaşır.

Agentliyin yerli qurumunun və ya “DOST” mərkəzinin əməkdaşı tərəfindən Nazirliyin Mərkəzləşdirilmiş elektron informasiya sisteminin “Əmək və Məşğulluq” altsistemində “Sosial iş yerlərində işçilərin əməkhaqlarının maliyyələşdirilməsi üçün Ərizə”nin doldurulmasına köməklik göstərilir və ya əməkhaqlarının bir hissəsinin maliyyələşdirilməsi üçün müraciət etmək istəyən işəgötürənlər tərəfindən “Elektron hökumət” və ya “e-sosial” portallarının mövcud autentifikasiya vasitələrindən istifadə etməklə həmin Ərizə doldurularaq təsdiq edilir.

Müraciət qeydiyyata alındıqdan sonra 10 (on) iş günü ərzində işəgötürənin qanunvericiliyin tələblərinə uyğunluğu araşdırılır.

İşəgötürən qanunvericilikdə müəyyən edilən tələblərə uyğun olduqda ona bu barədə elektron bildiriş göndərilir və Agentliklə işəgötürən arasında Ərizədə göstərilən boş (vakant) iş yerləri üzrə işə qəbul ediləcək işçilərin əməkhaqlarının qanunvericilikdə göstərilən hissəsinin işsizlikdən sığorta vəsaiti hesabına ödənilməsinə dair “Sosial iş yerləri üzrə əməkhaqqının maliyyələşdirilməsinə dair Müqavilə” imzalanır.

"İnzibati icraat haqqında" Azərbaycan Respublikası Qanununun 71-72-ci maddələrinə əsasən xidmət istifadəçiləri xidmətin göstərilməsindən edilən imtinadan 30 gün müddətində yuxarı səlahiyyətli orqana inzibati qaydada şikayət verə bilər. İnzibati şikayətin forması "İnzibati icraat haqqında" Azərbaycan Respublikası Qanununun 74-cü maddəsinə uyğun olmalıdır. Şikayətə daxil olduğu gündən "İnzibati icraat haqqında" Azərbaycan Respublikası Qanununun 78-ci maddəsinə əsasən 1 ay müddətində baxılır və mahiyyəti üzrə qərar qəbul edilir. Müəyyən edilmiş müddət ərzində qərar qəbul edilmədikdə və ya qəbul edilmiş qərarla razılaşmadıqda, şikayətçi məhkəməyə şikayət verə bilər.