DOST Agentliyində ictimai dinləmə və müzakirə keçirilib

DOST Agentliyində “Dövlət sosial xidmətlərinin “bir pəncərə”dən təqdim edilməsinə dair maarifləndirmə və elektronlaşdırılmasına ehtiyac yaranan xidmətlər barədə” ictimai dinləmə və müzakirə keçirilib.

İctimai iştirakçılıq haqqında Azərbaycan Respublikasının Qanununun tələbinə əsasən təşkil olunan tədbirdə Əmək və Əhalinin Sosial Müdafiəsi Nazirliyi yanında İctima Şuranın üzvləri, vətəndaş cəmiyyəti institutlarının nümayəndələri, həmçinin mütəxəssis və ekspertlər iştirak edib.

DOST Agentliyinin İdarə Heyətinin sədri Fərid Məmmədov tədbir iştirakçılarına DOST mərkəzlərinin fəaliyyəti barədə məlumat verib. DOST konsepsiyasının ölkəmizdə dövlət sosial xidmətlərinin “bir pəncərə”dən, operativ, vətəndaş məmnunluğu prinsipi əsasında göstərilməsinə şərait yaratdığı vurğulanıb. Qeyd olunub ki, indiyədək 1 milyon 500 mindən çox vətəndaş DOST xidmətlərindən yararlanıb və bu xidmətlərdən vətəndaş məmnunluğu səviyyəsi 98 faizdən yüksəkdir. Agentliyin bir çox beynəlxalq mükafatlarla təltif edildiyi, DOST təcrübəsinin digər ölkələrdə tətbiqinin beynəlxalq qurumlar tərəfindən təşviq olunduğu diqqətə çatdırılıb.

Daha sonra “Dövlət sosial xidmətlərinin “bir pəncərə”dən təqdim edilməsinə dair maarifləndirmə və elektronlaşdırılmasına ehtiyac yaranan xidmətlər barədə” müzakirələr aparılıb. Tədbir iştirakçıları mövzu ilə bağlı fikirlər səsləndirib, mövcud vəziyyəti qiymətləndirib və yeni təkliflər veriblər.