Sosial xidmət istiqamətində göstərilən xidmətlər

Sosial xidmət - çətin həyat şəraitində yaşayan şəxsin (ailənin) sosial problemlərinin aradan qaldırılması və ictimai həyatda digər insanlarla bərabər iştirak imkanlarının yaradılması istiqamətində həyata keçirilən kompleks tədbirlərdir.

Çətin həyat şəraitində olan şəxs sosial xidmət göstərilməsi üçün yaşayış yeri üzrə müvafiq icra hakimiyyəti orqanına ərizə və ərizəyə “Sosial xidmət haqqında” Azərbaycan Respublikası Qanununun 7-ci maddəsində nəzərdə tutulmuş müvafiq əsası təsdiq edən digər sənədlər əlavə edilməklə müraciət edir. Çətin həyat şəraitində olan ailəyə sosial xidmət göstərilməsi üçün ailənin yetkinlik yaşına çatmış üzvlərindən biri müraciət edə bilər. 

Azərbaycan Respublikası Prezidentinin 2018-ci il 10 dekabr tarixli 387 nömrəli Fərmanı ilə təsdiq edilmiş “DOST Mərkəzlərində göstərilən xidmətlərin siyahısı”na əsasən Sosial xidmət sahəsində göstərilən xidmətlər üzrə aşağıdakı xidmətlər göstərilir:

• müəyyən yaşayış yeri olmayan şəxslərin müvəqqəti sığınacağa qəbul edilməsi;
• əlilliyi olan gənclərin peşə-əmək reabilitasiya mərkəzlərinə qəbul edilməsi;
• əlilliyi olan şəxslərin minik avtomobili ilə təmin edilməsi;
• məişət zorakılığından zərər çəkmiş şəxslərin dövlət yardım mərkəzlərinə qəbul edilməsi;
• baxımsız, kimsəsiz və sosial təhlükəli vəziyyətdə olan yetkinlik yaşına çatmayanların sosial xidmət müəssisələrinə qəbul edilməsi;
• insan alveri qurbanlarının yardım mərkəzlərinə qəbul edilməsi;
• sosial-hüquqi xidmətlərin göstərilməsi;
• qanunda və digər normativ hüquqi aktlarda nəzərdə tutulmuş hallarda şəxslərin sanatoriya-kurort yollayışları ilə təmin edilməsi;
• şəxslərin Əmək və Əhalinin Sosial Müdafiəsi Nazirliyinin yaradıcılıq mərkəzlərinə qəbul edilməsi;
• təhsilə cəlb olunmayan əlilliyi olan uşaqların sosial xidmət müəssisələrinə qəbul edilməsi;
• xəstəlik və əlilliklə əlaqədar özünəqulluq qabiliyyəti, habelə onlara qulluq və kömək edə biləcək əməkqabiliyyətli qohumları və ya qanuni nümayəndələri olmayan şəxslərin (ailələrin) sosial xidmət müəssisələrinə qəbul edilməsi;
• ahıllıqla əlaqədar özünəqulluq qabiliyyəti, habelə onlara qulluq və kömək edə biləcək əməkqabiliyyətli qohumları və ya qanuni nümayəndələri olmayan şəxslərin (ailələrin) sosial xidmət müəssisələrinə qəbul edilməsi;
• uşaqlar üçün dövlət sosial xidmət müəssisələrinin, habelə ümumi təyinatlı internat tipli və internat tipli xüsusi ümumtəhsil məktəblərinin valideynlərini itirmiş və valideyn himayəsindən məhrum olmuş məzunlarının “Məzun evi” sosial xidmət müəssisəsində mənzillə təmin edilməsi;
• görmə qabiliyyəti məhdudluğu olan 5-29 yaşlı şəxslərin sosial xidmət müəssisələrinə qəbul edilməsi;
• penitensiar müəssisələrdə cəza çəkməkdən azad edilmiş şəxslərin sosial adaptasiya mərkəzlərinə qəbul edilməsi;
• evdə (səyyar) sosial xidmət göstərilməsi;
• sosial məsləhət yardımı göstərilməsi;
• sosial-pedaqoji xidmətlər göstərilməsi;
• sosial-psixoloji xidmətlər göstərilməsi;
• “Əmək veteranı” adı və vəsiqəsinin verilməsi;
• “Şəhid ailəsi üzvü” vəsiqəsinin verilməsi;
• normativ hüquqi aktlarda nəzərdə tutulmuş hallarda şəxslərin yaşayış sahəsi ilə təmin edilməsi ilə bağlı məlumat verilməsi;
• sosial xidmətlər üzrə arayışların verilməsi.